МоллагIдола дика хIама хьадеш хилча, цкъа хьалха цхьаннена дага а дехе, тIаккха тIехьа латтачар хьал а лаьце, дIахо болча наха а дIатIаийце, дахьу. Цхьаннегара шоллагIчунга а доалаш, шоллагIчунгара кхоалагIчунга а доалаш, дикка гаьна даллалца дIадода из гIулакх. Иштта цу ларах лархIа мегаргдолаш ба укх вIашагIкхетара болам а. Фонда кулгалхочоа Киев Салмана Абубакара дагадохарца, цунга хьалхале а йолаш баьхкабар Назранерча гIалгIай цIий дIа-хьа доттара йолча станце белгалъяьча фонда викалаш «РСПК» оалача станце.

МоллагIа цIий дIадала воагIача сагага хоаттача тайпара, хоза моаршал а хаьтта, раьза болаш, укх балхаца чам а болаш, фонда викалаш шоайцига бахкара царна баркал оалаш, моаршал хоатташ духьала бахар «РСПК» болхлой. Хьаьшашкара цIий дIаэцале хьалха хIара доакъашхочунга чай а молийташ, цIий дIадала йиш йолаш могаш вий вац а хьожаш, хIаравар лерттIа тIахьожам беш чакхавоаккхаш, дIабихьар цар шоай болх.

РСПКа викалаша яхачох, вай мехка цIий дIачудалара тIехьа бола болх массаза хьабе безаш ба. Из дувзаденна да тIехьарча хана вай мехка каст-кастта хатараш хулаш хилари, цхьацца лазараш даржаш хилари бахьан долаш.

Могаш боацача наха дарба хилар догдоахаш, царна хулаш йолча гIойленгахьа дакъа хила уйла йолаш, кхы дIахо йодача хана а цIий дIалуш дакъа лаца чам болаш болча фонда викалашта баркал оалаш, йист хилар ГIалгIайчен цIий дIа-хьа доттара йолча станце керттера лор ТIумгIой СаIида Макка. «Тахан оаша денар доккха гIулакх да. Шун цIий дIачу-хьачу детта цхьан сага дарба хуле, оаша бена никъ кхоачаш хиннаб, цун бахьан хургда шох. Дала шоай балхашкахьа, гIулакхашкахьа совдоахалда шо. Тахан массавар цхьана а волаш, бартаца вай дIабахьа безаш болх ба ер. ЧIоагIа дика хета тхона кхы тIехьагIа а цIий хьачудала ший аьттув бар веча».

Белгалде доагIа, берригаш а цIи дIаденна фонда викалаш шоай ногIал тIехьа раьза болаш, цIий дIадалар кхераме болх ба, яхаш, дувца къамаьлаш харца, даьсса хабар хилар гуча а даьнна, чубахалга. Цар хьаяхачох, шоай аьттув ма боалла кхы дIахо йодача хана а цу наькъа тIехьа болх дIакхахьа уйла йолаш ба уж.

«ХIанз укх тайпара дола ногIал тха фондо хьалхара даь да, дIахо, тхоай низ дIа ма кхоачча, кхы а укх гIулакхагахьа дакъа лаца уйла йолаш да тхо. Тха уйла я, тахан кIеззигачунца а вай мехка бахархошта гIо де вай аьттув болга наха дIахайта, ер болх вайна юкъе хозача оамалца, маьршача гIо-новкъостал дирца мехка юкъе баржийта», — йоах «Фонд поддержки предпринимательства Ингушетии» яхача юкъарчен кулгалхочо Киев Абабукара.

Цунга хьалхале а йолаш ног1ала дакъа лоацаш хинна, наха гIодара тIехьа цIий дIадала баьхка фонда викалаш цIий дIа-хьа доттара йолча станце болхлошта баркал оалаш бар, хозача дешаца, к1аьдача оамалца шоаш т1аэцар бахьан долаш. Ший къамаьле Киев Абубакара аьлар, шоай болхлой а кхы дIахо бола мехка бахархой а дакъа боалабеш, укх тайпара болх дIакхухьаргба шоаш дIахо йодача хана а. Иштта цо белгалдир, укх тайпара вIаший гIодара болх массаболча мехка бахархоша цхьана дIакхухьаш хилар, вай мехка чIоагIа лоархIам болаш хIама долга.

МоллагIдола дика хIама хьадар, из наха юкъе доаржадар дика Iадат да. ХIанз укхаза вай мехка эшача наха дIачу-хьачу дотта цIий хилар ловш хьа а баьхка, цIий дIалуш болчаргара из гIулакх хьа а ийца, хоза дIахо дIадихьача дика хургда кхычар а.

Дика хIама хьадара тIехьа, шийгахьа пайда бола хоза Iадат воашта юкъе доаржадара тIехьа Дала аьттув боаккхалба вай.

Матенаькъан Илез

«Сердало» № 16